TIRANË- Të gjithë ata prindër që ua kanë bërë pasaportat fëmijëve në vitin 2009, duhet të aplikojnë sërish pasi rrezikojnë të kthehen në kufi. Bëhet fjalë për një gabim të kompanisë ALEAT, por që duhet ta paguajnë shqiptarët. Kështu në periudhën kohore Prill 2009 – 2010 janë lëshuar pasaporta 10 vjeçare për fëmijë kur në fakt ligji parashikon që pasaportat shqiptare janë me afat 5 vjeçar.
Kështu të gjithë ata prindër që kanë marrë pasaporta për fëmijët në këtë periudhë tani duhet të bëjnë të rejat pasi rrezukojnë të kthehen në kufi nëse kanë planifikuar udhëtime jashtë vendit.
Ky fenomen ka ndodhur gjatë këtyre ditëve të festave. “Në disa Pika të Kalimit të Kufirit, janë evidentuar raste të refuzimit të daljes për arsye të pavlefshmërisë së pasaportave të fëmijëve. Ky refuzim është i pashmangshëm”, bën të ditur policia e shtetit përmes një komunikate për mediat.
Sakaq, policia thotë se kërkojmë mirëkuptimin e qytetareve që para se të nisen për të udhëtuar jashtë shtetit, të kontrollojnë afatin e vlefshmërisë së pasaportës së fëmijëve të tyre.
“Çdo shtetas që udhëton jashtë Shqipërisë duhet ta ketë vlefshmërinë e pasaportës mbi 3 muaj, nga dita e daljes në kufi”, sqaron policia.
