Siguracioni i makinave pritet të rritet sërish. Drafti ligjor është dorëzuar në Komisionin Parlamentar të Ekonomisë nga Autoriteti i Mbikëqyrjes Financiare (AMF).
Në nismën ligjore është parashikuar për herë të parë që kontrata e sigurimit të mbulojë edhe dëmtimin e pronës publike (semafor, shtylla, barriera, etj). Ky kusht rrjedhimisht do të llogaritet edhe në çmimin e primit që qytetarët paguajnë për siguracionin e mjeteve, duke rritur vlerën e tij.
Siguracionet tashmë me ligjin e ri do të jenë sipas sistemit bonus-malus, ku vlera e pagesës nga drejtuesit e mjeteve do të llogaritet në bazë të numrit të aksidenteve dhe vjetërsisë së shoferit.
Po ashtu një tjetër kërkesë e shtuar për drejtuesit e mjetit është edhe bllokimi i lëshimit të kolaudimit në rastin që nuk paraqitet siguracioni i prerë, ndërsa polici i qarkullimit rrugor ka të drejtë ta bllokojë automjetin deri në blerjen e kartonit të sigurimit, raporton tv Klan.
Pronari i makinës duhet që të mbajë me vete tashmë edhe Raportin Evropian të Aksidenteve, i cili do të shërbejë për përshkrimin e ngjarjes së aksidentit për dëme me vlerë më të vogël se 3 mijë dollarë e do t’i dorëzohet shoqërisë së sigurimit me firmën e të dy palëve të përfshira në aksident.
Me ligjin e ri, kompanitë nuk ka kanë të drejtë të ndryshojnë tarifat më shumë se dy herë në vit, ndërsa kërkohet që të njoftohen 30 ditë përpara dhe të miratohen nga Autoriteti i Mbikëqyrjes Financiare.
