Këtë të premte IKMT ka ndërmarë një aksion në ambientet e “Prestige Resort” në plazhin e Golemit, që është në pronësi të Fokus Grup, një grup mediatik që zotëron edhe televizionin News 24, BalkanWeb dhe gazetën Panorama.
Mediat në fjalë reaguan për këtë situatë duke e quajtur të paligjshëm këtë aksion dhe publikuan dokumentin dhe lejen e firmosur nga kryeministri Edi Rama, në cilësinë e kryetarit të KKT.
I menjëhershëm ka qenë reagimi i Ministrisë së Brendshme. Ministria në një status në “Facebook” ka publikuar disa dokumentet dhe thotë se leja është dhënë me kusht pasi të plotësohet dokumentacioni tekniko-ligjor dhe të paguhen taksat përkatëse.
Po ashtu Ministria e Brendshme shton se asnjëri nga kushtet nuk është plotësuar.
“Pretendimi i mediave të zotit Irfan Hysenbelliu se ndërhyrja e sotme e IKMT është e paligjshme pasi resorti paska leje të miratuar është një tjetër manipulim i opinionit publik.
Dokumenti i nxjerrë në mediat në fjalë me firmën e kryeministrit Edi Rama si kryetar i KKT provon të kundërtën e pretendimit.
Leja është një leje me kusht, ku thuhet qartësisht se dokumenti i lejes së ndërtimit do të jepet vetëm pasi tē plotësohet dokumentacioni tekniko-ligjor dhe të paguhen taksat përkatëse.
Asnjëri nga kushtet nuk është plotësuar dhe sot zoti Irfan Hysenbelliu i detyrohet shtetit dhe qytetarëve kthimin e sipërfaqeve të zaptuara si edhe borxhin financiar nga mospagimi i taksave”-shkruan ministria.
