Ditën e sotme do të nis prishja e tregut elektrik të vendosur pranë zonës së Shkollës së Baletit. Ndërkohë, tregtarët kanë protestuar kundër vendimit të Bashkisë së Tiranës., duke thënë se ata nuk janë lajmëruar më herët për boshatisjen e tregut.
Mësohet se tregtarët kanë dorëzuar një peticion kundër prishjes së tregut në Bashki, por që sipas tyre nuk u mor parasysh.
Po ashtu ata kanë kërkuar një takim me kryetarin e Bashkisë së Tiranës Erion Veliaj, por ky i fundit nuk i ka pritur tregtarët, por një drejtoreshë sektori.
“Nuk kemi ku të çojmë mallin. Me këtë ushqejmë fëmijët. Do i hedhim në Lanë.”, tha një prej tregtarëve.
“Ky është një turp që bën bashkia. Janë 232 veta që punojnë këtu. Ne i dhamë votën për më mirë jo të na lërë në mes të rrugëve. Po bëjnë masakër me tregtarët. Na kanë thënë shkoni ku të doni, do ta prishim. Paguajmë taksat një më një,”-tha një tjetër tregtar.
Gjithashtu, tregtarët kërkojnë që bashkia tu gjejë një vend ku do të ushtrojnë biznesin e tyre.
“Kontenierët i ka vendosur bashkia jo ne. 30 vjet që paguajmë taksa. Jemi tregtarë të licencuar jo ambulantë. Nuk kemi pasur asnjë negociim. Tani na thotë të shkojmë në Shkozë. Ta sitemojë vendin bashkia dhe të mos na lërë rrugëve”.Opinion.al
