Fadromat dhe policia kanë qenë sot në zonën e Bregut të Lumit, për të vazhduar me prishjen e shtëpive, në kuadër të projektit të Bulevardit të Madh. Të pranishëm kanë qenë edhe ish-deputetët e opozitës, Klevis Balliu dhe Endrit Braimllari. Ata kanë denoncuar dhunën që policia ka ushtruar ndaj banorëve, duke thënë se kërkohet shpronësim siç ka ndodhur edhe për segmentet e tjerë të këtij projekti.
“Situata është se banorët e lotit të parë dhe të lotit të dytë janë shpronësuar, banorët e lotit të tretë nuk po shpronësohen. Nuk e di nëse është për shkak të urrejtjes që mazhoranca ka ndaj veriut, sepse këta janë kryesisht nga veriu. Policët përdoren si mercenarë. Policia dhunon gra dhe fëmijë. Avokati i Popullit duhet të veprojë më shpejt, i bëj thirrje të veprojë për mbrojtjen e banorëve. Që në orën 6 të mëngjesit janë parë mijëra policë që vijnë si ushtri”, ka thënë Klevis Balliu.
Ndërkohë ish-deputeti i LSI-së Endrit Braimllari tha se banorët janë trajtuar si terroristë, duke i nxjerrë nga shtëpia me pizhame që në 6 të mëngjesit.
“Situata është e degraduar, Edi Rama ka dhunuar gra. Shefi i Komisariatit numër katër është filmuar duke dhunuar një grua. Nuk e kuptoj se çfarë dëmi mund t’i shkaktojnë këta banorë të varfër Edi Ramës, sot lihen të lirë ata që grabisin Rinasin dhe arrestohen të rinj e të reja që mbrojnë pronën e tyre. I kanë trajtuar si terroristë, i kanë nxjerrë me pizhame në orën 6 të mëngjesit nga shtëpia”, është shprehur Endrit Braimllari./Opinion.al
