Kryetari i Partisë Demokratike, Lulzim Basha, sonte, ka reaguar për prishjen e kullës së antikomunistit Prek Cali në Malësinë e Madhe.
Përmes një postimi në “Facebook”, Basha ka theksuar se Edi Rama nuk mund t’a durojë nderimin e një prijësi legjendar antikomunist si Prek Cali, ndërsa shton se prishja e kullës ditën e sotme, është goditje e simbolit të kryengritjes së Kelmendit, revoltës së parë antikomuniste të Europës.
“Ato mure në kullën e Calëve u ndërtuan falë donacionëve të shqiptarëve patriotë të Amerikës. Qeveria duhej t’a legalizonte restaurimin për atë çka Kulla e Prek Calit përfaqëson për Kelmendin, Malësinë dhe gjithë Shqipërinë”, shkruan Basha.
Ai deklaron se gjesti i sotëm i Edi Ramës, është një akt urrejtje por edhe dobësie, pasi kur kthen pinjollët e Byrosë dhe xhelatët e diktaturës në krye të vendit, të tremb kujtimi dhe hija e Prek Calit.
“Kelmendasit, malësorët dhe mbarë shqiptarët patriotë do t’ia japin përgjigjen pjellës së keqe”, thekson Basha.
