Ministria e Jashtme e Greqisë duke shprehur shqetësim për vendimin për prishjen e banesave të 19 familjeve minoritare në Himarë, u ka kujtuar autoriteteve shqiptare se mbrojtja e të drejtës së pronësisë dhe minoriteteve është kusht për integrimin në BE.
Në një komunikatë për mediat të publikuar në faqen e saj zyrtare në internet, Ministria e Jashtme e ka cilësuar të papranueshme shembjen e banesave të minoritarëve.
“Mbrojtja e të drejtave të pronësisë veçanërisht ajo e minoriteteve, është një pjesë e 5 kushteve të vendosura nga Bashkimi Evropian për hapjen e negociatave për anëtarësimin e Shqipërisë.
Prandaj, në qoftë se Shqipëria dëshiron të anëtarësohet në Bashkimin Evropian, duhet të tregojë që vepron si një shtet ligjor duke mbrojtur nga arbitrariteti dhe veprimet e paligjshme të drejtat e të gjithë banorëve pavarësisht kombësisë dhe origjinës”, thuhet në komunikatë.
