Banorët e bregut të lumit janë konfliktuar këtë mëngjes me punonjësit e policisë, pasi është vendosur se atyre do t’u prishen shtëpitë për punimet e Bulevardit të ri. Disa qytetarë kanë hipur në çatitë e shtëpive dhe kanë gjuajtur me gurë ndaj policëve, ndërsa banorë të tjerë mbajnë shkopinj në duar.
“Ta vënë fadromën, e do shohin viktimën e parë. Policia të ikë në punë të vet. T’ju vijmë ne në shtëpinë tuaj, çfarë do bëni ju? Jam i bindur se ju e kuptoni shumë mirë se ky urdhër nuk duhet zbatuar, por ju e zbatoni”, ka thënë një prej qytetarëve.
Qytetari tha se fillimisht një punonjës i bashkisë u ka sjellë shkresën, sipas së cilës do të prishen 38 shtëpi dhe do të dëmshpërblehen. Konkretisht, shtëpia e banorit që ka folur përballë kamerave është vlerësuar rreth 36 milionë lekë të vjetra dhe ata kanë vendosur ta pranojnë. Por problemi sipas tij, është se para një muaji kryetari i Bashkisë Erion Veliaj ka deklaruar se nuk do të jepet asnjë lek për kompensimin e tyre.
Të pranishëm kanë qenë edhe përfaqësues të Partisë Demokratike. “Vjen si horr, ka sjellë një tufë me njerëz e do që të përplasen qytetarët me policinë. Të mbrohen shtëpitë me çdo çmim ndaj këtij pushtuesi. I bëj thirrje qytetarëve të marrin të gjitha masat, të mos lejojnë fadromën deri sa të ketë një marrëveshje. Jo të dalin 38 familje në rrugë pa banesë sociale, pa dëmshpërblim”, ka thënë ish-deputeti demokrat Klevis Balliu.
Ndërkohë policia u ka bërë thirrje banorëve të mos godasin me gurë, ndërsa në vendngjarje kanë mbërritur edhe Forcat e Ndërhyrjes së Shpejtë./Opinion.al
