Inspektorati i Mbrojtjes së Territorit i mbështetur nga forca të policisë, ka nisur sot aksionin për prishjen e disa banesave në Shkozë, që preken nga projekti i Unazës së Re.
Inspektorët dhe forcat e policisë janë përballur me banorët e zonës të cilët thonë se nuk do të lirojnë banesat e tyre pasi ato janë të legalizuara. Sipas banorëve policia ka ushtruar dhunë psikologjike dhe fizike. Ndërkohë deri tani janë shoqëruar 2 prej protestuesve.
Më tej banorët shtojnë se 4 nga shtëpitë që kërkohen të prishen janë të legalizuara dhe njëra është në proces legalizimi dhe ka një vendim gjykate që thotë se ‘shtëpia nuk mund të preket deri në momentin që të dalë një vendim gjykate përfundimtar’.
“Katër shtëpia janë të legalizuara, shtëpia ime është në mes e pa legalizuar. Unë jam në gjyq dhe duhet të presim vendimin e gjykatës. Nuk mund të më prishin banesën pa dëmshpërblim. Kanë ardhur 4 ditë resht që më kërkojnë të liroj shtëpinë” thotë një nga banorët.
Banorët kërkojnë gjithashtu që atyre ti paraqitet vendimi për prishjen e banesave të tyre ndërkohë raportohet se në zonë ka qenë e vështirë edhe për mediat që të jenë të pranishme.
“Ku do ti çojmë kalamajtë ne, nuk e dimë, proces legalizimi qe ne 2005, nuk kemi pas leke, asnjë dokument nuk na kane dhënë, asnjë vendim, qe te leme shtëpinë, vetëm njoftim për tu shembur, Pse nuk vjen bashkia te na strehoje o vlla, ku do ti çojmë fëmijët ne. Ne jemi te izoluar, nuk na lënë” thotë një tjetër banor.
Banorëve të Shkozës iu ka ardhur në mbështetje edhe ish-deputeti i Partisë Demokratike, Aldo Bumçi.
Projekti i Unazës së Re parashikon që të shemben rreth 17 banesa në zonën e Shkozës. /Opinion.al
