TIRANË- Disa pacientë të Onkologjikut kanë ngritur zërin e tyre pasi nuk po arrijnë dot të bëjnë terapinë. Pajisja e orthovoltazhit (rrezeve për kancerin e lëkurës) në Shërbimin Onkologjik të QSUT ka pësuar një defekt dhe është jashtë funksionit.
Pacientët të cilët ndodhen në ambientet e QSUT për të kryer trajtimin e sëmundjeve janë shprehur të frikësuar dhe i kanë kërkuar ministrisë së Shëndetësisë të riparojë sa më shpejt pajisjen pasi për ta, trajtimi është i domosdoshëm.
Ata shprehen të revoltuar nga kjo situatë e krijuar, duke thënë se shëndeti i tyre rrezikohet nga mungesa e këtij shërbimi. “Kemi disa ditë që nuk marrim kurën pasi aparatura prishet vazhdimisht e sot nuk ndizet fare. Ministria e Shëndetësisë të mos na lërë të vdesim. Jemi të moshuar dhe të sëmurë rëndë. Vijmë nga rrethet e kemi të pamundur të presim e mos të marrim shërbim. Sëmundja jonë agravon çdo ditë nëse nuk marrim dozën e rrezatimit”, thonë pacientët.
