Pak orë pasi u ekzekutua poshtë banesës, mëngjesin e sotëm, fqinjët e Marjo Majollarit dhe familjarë të tij kanë vendosur tufa me lule dhe kanë ndezur qirinj në vendin ku u vra 28-vjeçari.
Të tronditur nga ngjarja dhe mes lotësh, ata thonë se Mario ishte një djalë shembull, i arsimuar, dhe i qetë, raporton BW.
Fqinjët thonë se nuk ishin në dijeni të së shkuarës së babait të Marios, pasi prindërit e tij ishin divorcuar kur ai ishte vetëm 2 vjeç. Nëna e tij është kujdesur për ta rritur dhe arsimuar.
Ata thonë se Mario ka punuar që në moshë të vogël, për të përballuar shpenzimet.
Ngjarja
Një person mbeti i vrarë me armë zjarri mbrëmjen e së martës para banesës së tij në zonën e Kinostudios në Tiranë. Ngjarja ndodhi rreth orës 20:25, në rrethana ende të paqarta.
Viktima është një 28-vjeçar i identifikuar si Mario Majollari, ndërsa autorët e kësaj ngjarjeje nuk dihen ende. Dyshimet janë se i riu u ekzekutua me armë me silenciator, pasi dëshmitarë thanë se nuk kishin dëgjuar zhurma.
Ai kishte pak kohë që ishte kthyer nga Suedia, ku kishte shkuar në vitin 2015 për të kërkuar azil, pasi sipas pretendimit të tij, ishte i kërcënuar për hakmarrje.
Dyshimet paraprake të policisë janë se pas ekzekutimit të Mario Majollarit qëndrojnë motivet e hakmarrjes. Kjo pasi babai i tij, Avni Majollari është një person i dënuar me burgim të përjetshëm për vrasje të dyfishtë. Pas një konflikti në vitin 2000, i ati i viktimës vrau me armë zjarri Armando Nelaj dhe Ilir Gjuzin, ngjarje e ndodhur në segmentin rrugor Tiranë–Dajt.
Pavarësisht pistës kryesore së vrasjes së 28-vjeçarit, atë të hakmarrjes, policia në këtë fazë paraprake të hetimit nuk përjashton edhe pista të tjera.
