4 Dhjetori është data që Partia Demokratike ka caktuar si datë përfundimtare për përmbyllen e primareve në të gjithë vendin. Lajmin e dha në një konferencë për shtyp kryetarja e Komisionit të Organizimit dhe Kontrollit të Operacioneve Elektorale, Albana Vokshi.
“Në çdo nivel të strukturave të PD po merren kandidatura. Vazhdojnë mbledhjet e strukturave. Në fund të javës mund t’ju themi një numër kandidaturash se përveçse atyre që kanë vetëkandiduar i takon fjala edhe antarësisë. Janë ata që po propozojnë kandidatura. Deri më datë 6 presim porpozime nga strukturat apo vetëpropozime për bashkitë e mëdha Tiranë, Elbasan, Durrës. Deri më 8 tetë presim marrjen e kandidaturave në degët e tjera. Është data 4 Dhjetor, kur do të përfundojnë primaret në të gjitha degët e vendit”-tha Vokshi.
Ndërkohë, anëtari i Komisionit, Eno Bozdo tha se këto primare do të kenë dy elementë të rëndësishëm: vendosja e balotazhit dhe vendosja e një debati midis kandidatëve të PD në primare.
“Përcaktohen dy elementë të rëndësishëm që nuk i kemi pasur në primaret e para më 6 mars: vendosja e balotazhit dhe vendosja e një debati midis kandidatëve të PD në primare. KOKOE organizon procesin zgjedhor të primareve. Pra në rolin e një Komisioni Qëndror të Zgjedhjeve. Nuk kemi të bëjmë vetëm me votimin e anëtarësisë, por do votojnë edhe simpatizantët. Pasi të shpallet data e primareve me vendim të Kryesisë, KOKOE shpall në mënyrë automatike hapjen e procesit zgjedhor që i paraprim fushatës së kandidatëve dhe përfundon me datën e mbajtjes së primareve. Kemi dy operacione që po ndodhin dhe KOKOE është përgjegjëse: regjistrimi i kandidatëve dhe fillimi i procesit në degët kryesore për regjistrimin e simpatizantëve. Ne mendojmë se data e përshtatshme për të bërë përzgjedhjen e kadidatëve përfundimtare do të jetë 6-13 nëntor. Këtu përcaktohen edhe dy gjera të rëndësishme që nuk i kemi pasur në primaret e para më 6 mars: vendosja e balotazhit dhe vendosja e një debati midis kandidatëve të PD në primare që vlen për anëtarët, simpatizantët dhe të gjithë të tjerët që janë të interesuar ta ndjekin”-tha Bozdo.
