Kryetari i Bashkisë së Tiranës, njëherazi edhe drejtuesi politik i qarkut për PS-në, Erion Veliaj, ka prezantuar këtë të dielë kandidatin e Partisë Socialiste në zgjedhjet e pjesshme vendore të 6 Marsit, për Bashkinë e Rrogozhinës, Edison Memolla.
Ai tha se PS duhet të fitojë zgjedhjet që të vazhdojë deri në fund rindërtimin dhe të mbarojë investimet.
Më tej, Veliaj u shpreh se PS do të fitojë dhe do të vazhdojë punën ndërsa PD-ja do të humbë dhe do të fillojë sherrin.
“Që të vazhdojmë deri në fund rindërtimin. Që të mbarojmë investimet. Që të kemi ujin aq shumë të dëshiruar, që të shohim rrugët në çdo fshat. Siç ju thashë në datën 6 Mars ata humbin dhe fillojnë sherrin. Në datë 6 Mars ne fitojmë dhe vazhdojmë punën. Në 7 Mars jemi tek zyshat, në 8 Mars jemi tek nënat, në 9 Mars fillojmë sezonin turistik, në 10 Mars vazhdojmë investimet në ujësjellës, në 11 Mars rrugë. Kjo është platforma jonë. Ky është misioni ynë, ky është kandidati ynë dhe kjo është familja jonë e madhe” tha Veliaj./Opinion.al
