Aktualitet

Prezantimi i Abetares së përbashkët /Rama: Është momenti që ta mbrojmë gjuhën nga…



Bëhu pjesë e Grupit Zyrtar të Opinion.al
>> KËTU <<
               Publikuar në : 19:18 - 11/09/22 |
Opi Nion

Kryeministri Edi Rama e cilësoi një moment të veçantë ktë të prezantimit të Abetares së përbashkët Kosovë-Shqipëri, i cili sipas tij vjen pas një pune intensive dhe të shkëlqyer.

Gjatë fjalës së tij pasditen e sotme, Rama tha se është koha që gjuha shqipe të mbrohet nga kërcënimet siç janë globalizimi, rrjetet sociale dhe lënia pas dore e librit.

“Dua ta them që në fillim që është moment shumë i veçantë. Kjo Abetare e unifikuar një punë e përbashkët Shqipëri-Kosovë, ishte një sfidë me kohën, pasi hapi vendimtar për tu nisur në rrugëtimin e realizimit të saj u hodh jo shumë kohë më parë. Puna e kërkuar nga të dyja skuadrat e ngritura enkas nga autorët që konkurruan në një proces krejt gjithëpërfshirës nga komisioni përzgjedhjes, shtëpitë botuese, ishte tejet voluminoze. Por ja ku jemi sot pikërisht në vigjilje të vitit të ri shkollor me një Abetare të Unifikuar, e cila është libër i njëjtë për nxënësit që hyjnë në dyert e shkollës për herë të parë në Shqipëri dhe Kosovë, një lajm shumë mi mirë është se edhe miqtë tanë në Maqedoninë e Veriut e përqafuan këtë ide pak më vonë, sepse ideja fillimisht ishte produkt i mbledhjes së dy qeverive, dhe sot e kanë marrë vendimin për ta futur Abetaren e unifikuar edhe në klasat ku mësojnë fëmijët e popullit shqiptar në Maqedoninë e Veriut. Sot përveçse në Shqipëri gjuha shqipe flitet në Kosovë, Maqedoninë  e Veriut, Malin e Zi, Luginën e Preshevës dhe përtej këtij perimetri ku jetojnë shqiptarët, jo vetëm në Europë por deri në Australi. Për ne është një barrë e posaçme që këtë gjuhë ta mbrojmë nga kërcënimet e mëdha që sot janë përherë e më të pranishme si rezultat i globalizimit, i rrjeteve sociale, i komunikimeve elektronike, si rezultat i një përhumbjeje të përgjithshëm të interesit ndaj librit, dhe si rezultat i goditjeve të njëpasnjëshme që gjuha i merr në një botë konsumi, ku pak i kushtohet vëmendje korrektimit, apo botimit të fjalëve dhe fjalive në gjuhën tonë, të cilat i jepen në konsum të përditshëm publikut. Sigurisht që kjo është një barrë e rëndë, por është një barrë e detyruar për tu mbajtur, në radhë të parë qeveritë, ku barrën kryesore e ka qeveria e Shqipërisë. Pavarësisht përpjekjeve të bëra ka ende shumë vështirësi për të ballafaquar, ka dhe shumë punë dhe nevojë për të pasur idetë e duhura se si mund të përballet gjithë kjo furi injorance dhe shpërdorimi ekstrem i gjuhës si rezultat i konsumit të saj si kurrë më parë”, tha Rama.

Në organizimin e mbajtur këtë të diel në Tiranë për prezantimin e Abetares së unifikuar, ishin të pranishëm dhe ministrat e Arsimit të Kosovës e Maqedonisë së Veriut./Opinion.al

 

Pas