Rrjeti televiziv Fox News ka arritur një marrëveshje që të paguajë 787.5 milionë dollarë kompanisë Sistemet e Votimit “Dominion”.
Dominion argumentoi se biznesi i saj ishte dëmtuar nga Fox që përhapte pretendime të rreme për zgjedhjet presidenciale të vitit 2020 të SHBA-së.
Njoftimi i papritur erdhi pasi juria ishte ulur në sallë dhe avokatët po përgatiteshin për hapjen e seancës.
Fox tha se zgjidhja e së martës në një nga gjyqet më të komentuara të shpifjes në historinë e fundit të SHBA-së pasqyroi “angazhimin e saj ndaj standardeve më të larta gazetareske”.
Deklarata e Fox shtoi pa elaboruar se rrjeti “pranon vendimet e gjykatës që konstatojnë se disa pretendime rreth Dominion janë të rreme”.
Shefi ekzekutiv i Dominion, John Poulos tha në një konferencë për shtyp se marrëveshja përfshinte që Fox ” të pranonte se kishte thënë gënjeshtra, duke shkaktuar dëme të mëdha në kompaninë e votimit”.
Justin Nelson, një avokat i Dominion, u tha gazetarëve se “e vërteta ka rëndësi”.
“Gënjeshtrat kanë pasoja”, shtoi ai. “Mbi dy vjet më parë, një lumë gënjeshtrash përfshiu Dominionin dhe zyrtarët e zgjedhjeve anembanë Amerikës në një univers alternativ të teorive konspirative, duke shkaktuar dëme të rënda për Dominion dhe vendin.”
Kompania “Dominion Voting Systems”, e cila prodhon pajisje elektronike për numërimin automatik të votave, ngriti një padi për shpifje kundër rrjetit televiziv “Fox News” në vitin 2021, duke kërkuar një dëmshpërblim prej 1.6 miliardë dollarësh. Firma e akuzoi televizionin “Fox News se ka manipuluar zgjedhjet e 2020 në SHBA në favor të demokratit Joe Biden ndaj presidentit republikan të atëhershëm Donald Trump. Dominion kishte argumentuar se këto pretendime i shkaktuan kompanisë “dëm ekonomik të madh dhe të pariparueshëm”.
