Klement Balili ose i ashtuquajturi “Eskobari i Ballkanit” i prangosur në janar të vitit 2019 akuzohet si kreu i një grupi kriminal që merrej me trafik ndërkombëtar të lëndëve narkotike.
Siç raporton gazetarja Glidona Daci për abcnews.al, ndërsa gjendet në burgun e sigurisë së lartë ku duhet të vuajë dënimin me 10 vjet heqje lirie, Klemend Balili i ka nisur një kërkesë Gjykatës Penale të Elbasanit.
Balili ka kërkuar transferimin nga burgu i sigurisë së lartë në një burg të zakonshëm për të përfituar edhe lehtësira sa i përket lejeve për të dalë nga qelia apo edhe ulje dënimi. Aktualisht ai ndodhet në burgun e Peqinit.
Gjykata e Krimeve të Rënda dënoi me 10 vite burg Klement Balilin në maj të këtij viti.
Ai u shpall fajtor për 4 akuza, atë të “trafikut të lëndëve narkotike”, “pastrimit të parave”, “pjesëmarrje në grup kriminal”, dhe për “deklarim të rremë, mosdeklarim dhe fshehje pasurie”.
“Eskobari i Ballkanit”, u vetëdorezua pas tre muajsh negociata mes familjarëve të tij dhe titullarëve të Policisë së Shtetit.
Kontakti i tij i parë me njerëzit e shtetit ka qenë në zonën mes Finiqit dhe Delvinës, ku ishte i pranishëm edhe Drejtori i Përgjitshëm i Policisë, Ardi Veliu./Burimi: abcnews.al
