Në një reportazh të botuar nga revista prestigjioze “Vanity Fair” Italia, qyteti i Beratit përshkruhet si një destinacion ëndrrash për pushime, i cili duket sikur ka dalë nga një përrallë.
I përfshirë në listën e Trashëgimisë Botërore të UNESCO-s që prej vitit 2008, Berati të mahnit me arkitekturën e tij karakteristike: shtëpi të bardha me çati të kuqe, rrugica me kalldrëm, kopshte të fshehura pas portave shumëngjyrëshe, kisha dhe xhami antike, dhe një kala që mbikëqyr qytetin nga lart.
Në këtë atmosferë magjike ndodhet një prej hoteleve të Beratit, që rekomandohet nga artikulli për të pushuar. Një vilë guri e kthyer në hotel me vetëm 6 dhoma, e kuruar me shumë detaje tradicionale, qilima me motive gjeometrike, objekte bakri, perde të qëndisura me dorë dhe mure guri të ruajtura me kujdes.
Nga tarraca e hotelit, vizitorët mund të shijojnë një pamje të jashtëzakonshme mbi lumin Osum dhe urën e Goricës. Sipas artikullit, përvoja në Berat nuk është vetëm vizuale, por edhe gastronomike, mëngjesi përfshin produkte të freskëta lokale si petulla, djathë dhie, reçel shtëpie dhe mjaltë vendas.
Në darkë shërbehen pjatat tradicionale shqiptare, si byrek, fërgesë, speca të mbushur, qofte dhe vera shumë e mirë vendase. Çdo përbërës në menu është vendase, sezonale dhe shumë i freskët, sipas traditës më të mirë shqiptare. Gjatë verës, darka shijohet nën qiellin me yje, me dritat e qytetit që krijojnë një skenografi të paharrueshme.
Duke ecur nëpër rrugët e qytetit të vjetër të Beratit, të duket sikur je katapultuar pas në kohë, shkruan prestigjiozja “Vanity Fair”, e cila e përshkruan Beratin si një qytet magjik, vend ku koha duket se ka ndaluar dhe ku çdo cep fton për t’u ndalur, për të vëzhguar dhe për të përjetuar bukurinë e thjeshtë dhe autentike të Shqipërisë së vërtetë. Klan News
