Turizmi i aventurës, sportet ujore, natyra, trashëgimia kulturore dhe magjia e liqenit të Prespës po tërheqin vizitorë të shumtë, të cilët gjejnë në këtë zonë përvoja unike eksplorimi.
Investimi për ndërtimin e plazhit ekologjik publik në Zaroshkë, fshatit që shtrihet në krah të ishullit të Maligradit, e ka pasuruar ofertën turistike të Prespës.
Plazhi ranor, mundësia për të ngritur kampingje, por edhe kulinaria e veçantë dhe traditat lokale, kanë krijuar një ambient mikpritës për të gjithë ata që zgjedhin Prespën për pushime.
“Është një destinacion tjetër, ku njerëzit mund të vijnë e të shohin, të bëjnë plazh. Mund të parkojnë mjetet e tyre kudo ku ka ujë. Është siguruar dhe sistemi i kanalizimeve. Energjia elektrike është duke punuar, gati nga përfundimi,” tha Pali Kolevski, kryetar i Bashkisë Pustec.
Sportet ujore janë një tjetër mundësi për të alternuar aventurën me atraksionet e tjera që ofron zona.
“Aktivitetin në Zaroshkë e zgjodhëm për terrenin. Është kombinuar mali, liqeni, vendi ku jemi dhe pjesa e gjërave antike: kishat, kishat eremite, ishulli,” tha Elton Dhefto, organizator i Kajak Albania.
Për vizitorët e fundjavës, sportet ujore, të kombinuara me kamping dhe eksplorim të zonës, i bëjnë pushimet në Prespë një eksperiencë përtej të zakonshmes.
“Ke mundësinë përveçse për një piknik në natyrë, që gjithsecili mund ta bëjë gjatë fundjavës, të njohësh njerëz që i kanë qejf sportet, për më tepër të mbledhurit së bashku. Kështu që është dhe një mënyrë e mirë për të promovuar zonën.”
“Komplet rajoni këtej frekuentohet, sidomos nga banorët e zonës përreth, por do të kishim dëshirë që këtë mrekulli të zonës ta ndanim me pjesën tjetër të Shqipërisë.”
Rritja e numrit të vizitorëve vendas dhe sidomos të huaj ka orientuar ekonominë lokale drejt turizmit familjar, çka ka shtuar strukturat akomoduese, duke e kthyer Prespën në një nga destinacionet më interesantë të juglindjes.
Klan News
