Ramush Haradinaj: Më shumë më bënin presion Presidenti Thaçi dhe Edi Rama me e heq taksën sesa udhëheqësit e tjerë botërorë. Insistonin që unë me respektu kërkesën e kancelares dhe presidentit Macron, se ky është një shans i mirë, kjo është një mundësi për Kosovën etj, mos me e humb këtë shans, e ku e di unë. Një insistim direkt i pandalshëm. Në një gjuhë që ishte në anglisht, që e merrnin vesh edhe kancelarja edhe presidenti Macron.
Kjo deklaratë e kryeministrit të Kosovës, një ditë pas samitit të Berlinit ku kancelaria gjermane dhe presidenti francez mblodhën liderët e Ballkanit Perëndimor, ka sjellë dhe reagimin e shefit të qeverisë shqiptare.
Në një postim të gjatë në rrjetet sociale, kryeministri Edi Rama shkruan se Haradinaj ka gënjyer për të dalë para popullit si “burrë i mirë”.
“Me vjen sinqerisht keq qe miku im Ramush, nuk e ka mësuar ende këtë rregull kaq të thjeshtë, megjithëse normalisht ky s’është as ndonjë rregull udhëheqësish ne fakt, po një norme elementare mirekuptimi njerezor. Nuk eshte hera e pare qe e bën, po është hera me e gabuar dhe prandaj këtë here, s’e kaloj dot në heshtje si te tjera”, shkruan Rama.
Ai hedh poshtë akuzat se i ka bërë presion kryeministrit të kosovës për të hequr taksën ndaj produkteve serbe. Sipas tij , Merkel dhe Macron i kanë kërkuar Haradinajt jo të heqë taksën por ta pezullojë atë për 4 apo 6 muaj.
“I kam sugjeruar Ramushit në dy momente ta pranoje këtë kërkesë të tyre, sepse kam menduar dhe mendoj që përfshirja direkte ne nivelin me të lartë e Gjermanisë dhe Francës, boshtit te Bashkimit Europian, u shfaq si një mundësi e re dhe shume e favorshme për ta shtruar çështjen e finalizimit te dialogut, ne nivelin me të larte të mundshëm”, shkruan Rama.
“Gjithsesi, meqë Ramushi u qa publikisht se unë i paskësha bërë më shumë presion se sa Vuçiçi për heqjen e taksës, mua s’më mbetet tjetër veçse te ngushëllohem me faktin qe pas samitit edhe Vuçiçi, u shpreh publikisht ndaj meje po aq i palumtur sa Ramushi. S’kam dashur dhe s’dua te hyj asnjëherë ne polemika publike me askënd në Kosove, aq me pak me kryeministrin e Kosovës. Uroj qe te mos jem i detyruar ta bëj përsëri. Ai ka te drejtën e tij të flasë ne emër të Kosovës, po mua s’ma heq dot askush të drejtën të flas për Kosovën”, përfundon reagimin e tij kryeministri Edi Rama. / Opinion.al
