E ftuar në “News 24”, Elisa Spirtopali ka folur për një rol të mundshëm të Presidentit Ilir Meta si negociator për krizën politike në vend. Spiropali ka thënë se Meta do kishte bërë mirë të këshillonte Monika Kryemadhin, ndërsa tani deputetët e rinj duhet të votojnë reformat që i duhen vendit, si reforma zgjedhore.
“Unë nuk e ç’kodoj dot deklaratën e Presidentit sepse nuk e kuptoj për cilat hapa e ka fjalën dhe kush duhet t’i ndërmarrë po do kishte qenë shumë mirë në rast se Presidenti do ta kishte këshilluar zonjën Kryemadhi në partinë nga ka dalë, që mos ta ndërmerrte atë hap. Se nuk është një hap para, është një hap në humnerë. Dhe kthim pas nuk ka. Pra, në Kuvend nuk kthehen dot më, tani të paktën të mbështesin kandidatët e tyre nëpër lista që duan të marrin pozicionet e tyre në kuvend. Të vijnë të votojnë reformën zgjedhore që është e domosdoshme dhe që ne patjetër do ta çojmë përpara dhe jemi shpresë plotë që deputetët e rinj të opozitës do ta votojnë reformën zgjedhore”, tha Spiropali.
Ministrja e Shtetit për Marrëdhëniet me Parlamentin ka përsëritur qëndrimin e mazhorancës se zgjedhjet parlamentare do të zhvillohen vetëm në vitin 2021, ndërsa në qershor Partia Socialiste do të marrë pjesë në zgjedhjet lokale dhe pret që edhe opozita të caktojë kandidatët e saj.
“Ne nuk mund t’i heqim qytetarëve të drejtën për të zgjedhur qytetarin e parë të bashkive. Ka një afat për t’u regjistruar edhe kandidatët edhe listat. Ne besojmë se do regjistrohen se nuk besoj se kanë humbur arsyen deri në këtë pikë. Mendjet racionale brenda opozitës do i bëjnë thirrje këtyre dy forcave të marrin pjesë në zgjedhje. Në të gjitha rastet ne jemi aty do paraqitemi dhe të shohim cilët do paraqiten për t’iu përgjigjur qytetarëve dhe për të ardhur në garë”, theksoi Spiropali./Opinion.al
