Ministrja e Shtetit për Marrëdhëniet me Parlamentin, Elisa Spiropali, ka folur këtë të premte për procesin e zgjedhjes së presidentit, për të cilin opozita ka paralajmëruar se nuk do të ulet në tryezë me mazhorancën pasi sipas tyre mazhoranca është tërhequr nga marrëveshja.
Në një intervistë në “ABC Live”, Spiropali u shpreh se mesa duket Grupi Parlamentar i PD-së nuk i ka 20 firma deputetësh për të propozuar një emër kandidat për President të Republikës.
“Nuk janë seriozë. Ose t’i japim vendit një President përfaqësues për të gjithë ose ata nuk e kanë këtë vullnet. Mesa duket ata nuk i kanë 20 firma deputetësh për të propozuar. Por problemin e brendshëm nuk mund ta çojnë në Kuvend për zgjedhjen e Presidentit. Nuk e duam që Presidenti të jetë një deputet socialist. Pikërisht për të hapur mundësi PD dhe aktorëve të tjerë që të mund të propozojë emra të vlefshëm. Në fund të këtij procesi me apo pa grupin, ne do mund t’i japim kësaj Republike një President të denjë,” -tha Spiropali.
Kujtojmë se është djegur raundi i parë dhe i dytë për zgjedhjen e presidentit pa asnjë kandidat të propozuar. Ndërkohë raundi i tretë pritet të mbahet më 30 Maj./Opinion.al
