Presidenti i Republikës së Shqipërisë, Ilir Meta, u prit nga guvernatori i Kalabrisë Mario Oliverio në Kështjellën Rajonale të Catanzaros.
Takimi u zhvillua në ditën e parë të vizitës tre ditore në Kalabri. Në prag të kremtimit të 550 vjetorit të vdekjes së Gjergj Kastriot Skëndërbeut që u mbajt në San Demetrio Corone, në prani të Kryetarit të Shtetit Sergio Mattarella.
Presidenti Meta, i shoqëruar nga ambasadorja e Shqipërisë në Itali, Anila Bitri dhe një delegacion diplomatik, zhvilloi me guvernatorin Oliverio një bisedë të përzemërt që përfundoi me një nënshkrim, të vendosur nga Presidenti Meta, i cili gjithashtu bëri një shkrim të gjatë, në librin e mysafirëve.
Gjatë takimit u zhvillua një diskutim i gjatë i lidhjeve historike dhe kulturore që bashkojnë dy popujt. Meta dhe Oliverio ranë dakord mbi nevojën për të intensifikuar partneritetet midis Kalabrisë dhe Shqipërisë.
Presidenti i Republikës, u takua gjithashtu dhe me Ipeshkvin e Eparhias së Ungrës, Hirësinë e Tij Donato Oliverio. Por dhe me autoritetet vendore e përfaqësues të bashkësisë arbëreshe. Të cilët organizuan një pritje madhështore me festime, këngë dhe valltarë të veshur me kostume tradicionale arbëreshe.
Presidenti Meta mirëpriti propozimin për krijimin e një Këshilli që do të punojë për ruajtjen e zakoneve, tipareve dhe riteve identitare arbëreshe. Ai premtoi mbështetjen personale e institucionale, sidomos në këtë Vit Mbarëkombëtar të Heroit tonë Kombëtar, Gjergj Kastrioti Skënderbeu.
“Arbëreshët janë një pasuri e vyer, madje edhe ndërkombëtare. Sepse ata ruajtën të paprekur zakonet, ritet, traditat, kulturën dhe gjuhën e kohës së madhe historike të Arbërit. Pa arbëreshët nuk do të kishte Rilindje Kombëtare shqiptare. Madje as Shqipëria, dhe as Kosova nuk do të ekzistonin sot e kësaj dite.” – vuri në dukje Presidenti i Republikës.
Më pas Kreu i Shtetit mori pjesë në meshën e shenjtë përkujtimore të mbajtur në Katedralen e Lungros për nder dhe në kujtim të Heroit tonë Kombëtar, Gjergj Kastrioti Skënderbeu. Duke iu drejtuar besimtarëve dhe të pranishmëve të shumtë, ai theksoi se:
“Është një nder i jashtëzakonshëm të marr pjesë në këtë meshë përshpirtjeje dhe bekimit të kujtimit e frymës së Gjergj Kastriotit, i cili jo vetëm përcaktoi identitetin europian të shqiptarëve, por ishte dhe do të jetë shqiptari më i gjallë ndër të gjithë shqiptarët.”
Gjatë kësaj meshe Presidenti i Republikës vlerësoi Imzot Donato Oliverio me Titullin “Kalorës i Urdhrit të Skënderbeut” me motivacionin: “Me mirënjohje të thellë për veprimtarinë e çmuar dhe të pakursyer në mbështetje të bashkësisë arbëreshe në Itali. Për përpjekjet e tij të pareshtura në ruajtje dhe përcjellje të riteve dhe të traditave kishtare në gjuhën arbëreshe”./Opinion.al
