Presidenti Ilir Meta ka dekretuar tre ligje në lidhje me mjedisin. Ligjet e kaluara në Kuvend janë për lejet e mjedisit, mbrojtjen e mjedisit dhe për pyjet.
Ligji për lejet dhe mbrojtjen e mjedisit ndryshojnë procedurat administrative dhe sistemin prej tre nivelesh të lejeve të mjedisit.
Ligji parashikon një rishikim të listës së bizneseve që deri më sot kishin detyrimin për t`u pajisur me leje mjedisi të tipit “C”, për ato aktivitete me ndikim të ulët në mjedis, duke ndikuar direkt në uljen e kostove për bizneset e vogla që nuk shkaktojnë ndotje të mjedisit, në varësi dhe të kapacitetit prodhues.
Sipas Presidentit, ligji për pyjet sjell një rregullim të ri sektorial dhe përafron pjesërisht dy rregullore të Bashkimit Europian. “Forcimi në terma të qartë në ligj, duke filluar nga dispozita e qëllimit të ligjit, të nevojës për mbrojtjen e pyjeve si pasuri me rëndësi të veçantë, për vlerat e mëdha dhe të pazëvendësueshme në mbrojtjen e klimës, të tokës, ruajtjen dhe përmirësimin e potencialeve prodhuese, të ekuilibrave të mjedisit natyror, biodiversitetit, burimeve gjenetike dhe regjimit hidrik, si detyrime me interes kombëtar dhe ndërkombëtar, është për t`u vlerësuar” thuhet në njoftimin e zyrës së shtypit të Presidencës. /Opinion.al
