Teksa Presidenti i Brazilit, Jair Bolsonaro, vijon qasjen indiferente ndaj Covid-19, viktimat në vend janë rritur ndjeshëm.
Brazili raportoi numrin më të madh të vdekjeve nga koronavirusi që nga nisja e pandemisë. Ky bilanc është njëherësh dhe më negativi në 24 orë në të gjithë hemisferën jugore.
Sipas ministrit të Shëndetësisë, Nelson Teich, 615 persona e humbën betejën përballë Covid-19 ditën e fundit, duke e çuar bilancin total të viktimave në më shumë se 8500.
Teich shtoi se tashmë është momenti kur qeveria mund të vendosë aplikimin e masave shtrënguese në disa nga zonat më të prekura nga pandemia.
Por, presidenti Jair Bolsonaro që prej shpërthimit të pandemisë e ka neglizhuar ashpërsinë e Covid-19 dhe ka inkurajuar qytetarët të vijojnë të shkojnë në punë.
Ai ka minimizuar vazhdimisht rrezikun e virusit dhe ka kritikuar ashpër përpjekjet e guvernatorëve dhe kryetarëve të bashkive për të vendosur masa për të kontrolluar përhapjen e virusit./Opinion.al
