Pas takimit me kreun e grupit parlamentar të PS-së, Taulant Balla, kryetari i Partisë Republikane, Fatmir Mediu në një prononcim për mediat është shprehur se propozimin me emrin e presidentit ta bëjnë si opozitë.
Ndër të tjera Mediu u shpreh se është absurde që politika të përjashtojë politikën, duke lënë të nënkuptohej se do të donte një president nga fusha politike.
Kreu i Partisë Republikane tha me bindje se as të hënën s’do të ketë kandidatë konkretë
“Si “Aleancë për Ndryshim” kemi vendosur që propozimet do ti bëjmë brenda opozitës, jashtë opozitës asnjë qëndrim. Unë nuk i ndaj as të rithemelimit apo ca emri i vini ju. Të gjithë deputetet duhet të marrin pjesë me një kandidat të përbashkët. Kam folur dje edhe me Bylykbashin, Boçin, Alibeajn, koleget e grupit aleanca për ndryshim dhe ky ka qenë qëndrimi ynë, duhet të kemi një qëndrim të përbashkët për kandidat dhe me pas t’ia paraqesim mazhorancës. Siç e shikoj nuk do ketë kandidat ditën e hënë. Është absurde që politika të përjashtojë politikën, por besoj që nuk mund ta ngushtojmë në një profil të caktuar. Duhet të jemi të gjerë në fusha të ndryshime. Qëndrimi ynë ishte qe ne do të kemi një dakordesi me opozitën për të shkuar të dakordësia me mazhorancën,”-tha Mediu.
