Tashmë është fakt që në mundjen shqiptare nuk ka më qetësi olimpike. Rikthehet sërish problemi i përçarjes me dy federata paralele. Ish-deputeti i Partisë Socialiste, Arben Ndoka, i cili ka qenë në qendër të akuzave nga opozita në vend teksa debatohej për çështjen e dekriminalizimit, është votëbesuar një ditë më parë në Shëngjin si president i Federatës.
Emri i Ndokës u bë shkak për përplasje në Kuvend, i akuzuar nga opozita se ka qenë i dënuar për prostitucion. Kjo e detyroi Ndokën që të lërë mandatin e deputetit duke shkruar edhe një letër drejtuar votuesve ku sqaronte pozicionet e tij. Megjithatë, për drejtuesit më të lartë të sportit, zgjedhja e Ndokës në krye të FSHM-së është një e drejtë e komunitetit.
Të pranishëm në procesin e 27 gushtit ishin si zëvendësministri i Arsimit dhe Sportit, Rauf Dimraj, por edhe presidenti i KOKSH-it, Viron Bezhani. Si Dimraj dhe Bezhani kanë qenë në një linjë të dy.
Dimraj
“Ai ka qenë një zgjedhje e disa shoqatave të mundjes. Pasi të depozitohet dosja në ministri, pastaj ky institucion do të japë konkluzionin e vet. Unë personalisht kam qenë i ftuar për të parë mënyrën e organizimit nga pikëpamja e zgjedhjeve të lira. E dyta, më interesonte të dija si ishte komunikimi midis individëve, pasi kjo ka lënë shumë për të dëshiruar në vendin tonë.
Më interesonte për të parë se çfarë programesh do të prezantohej në këtë forum. Për sqarim, që të njihet si proces ajo është në kompetencë të Ministrisë së Arsimit dhe Sportit. Këta janë anëtarë të asaj federate dhe ky ishte në konceptin e një mocioni mosbesimi për atë federatë”, ishte përgjigjja e zëvendësministrit Dimraj pas interesimit të gazetës “Panorama Sport”.
Presidenti Bezhani
Nga ana e tij, kreu i Olimpizmit sqaroi se në dijeninë e tij në këtë proces nuk ka pasur asnjë pengesë ligjore.
“Si fillim, unë nuk merrem me atë punë. Nuk jam i interesuar fare. Se çfarë zgjedhin ata është e drejta e tyre. Me sa më thanë ditën e Asamblesë, nuk ka asnjë pengesë ligjore në këtë proces. Shumë mirë mund të pyesni vetë të zotin dhe nuk mund të përgjigjem për këtë çështje.
Si president i Komitetit Olimpik Kombëtar Shqiptar, unë kam për borxh të shkoj, meqenëse më kishte ardhur ftesa me gjithë Ministrinë. Ne ishim prezent për të montuar zgjedhjet, si u zhvilluan. Dhe, për sqarim, ishin të gjithë kryetrajnerët dhe jo ata që kishin mashtruar poshtë e lart. Ishin prezent njerëzit që punojnë dhe i shërbejnë mundjes.
Njohjen e federatës nuk e kam unë në dorë. Unë do të raportoj për të gjithë problematikën, do të verifikojmë dokumentacion që kemi në dispozicion dhe pastaj do të relatojmë nëse do të njohim këtë federatë apo atë”.
