Presidenti Hassan Rouhani, deklaroi se Irani po përballet me presion “të paprecedent” nga sanksionet ndërkombëtare.
“Presionet nga armiqtë janë një luftë e paprecedentë në historinë e revolucionit tonë islamik … por nuk shpresoj dhe kam shpresë të madhe për të ardhmen dhe besoj se mund t’i kalojmë këto kushte të vështira nëse jemi të bashkuar. Sot nuk mund të thuhet nëse kushtet janë më të mira apo më të këqija sesa në periudhën e luftës (lufta me Irakun 1980-’88). Por, gjatë luftës ne nuk kemi pasur probleme me bankat tona, me shitjen e naftës, me importet dhe eksportet. Atëherë ka pasur vetëm sanksione mbi blerjen e armëve”, tha presidenti iranian.
Rouhani, i cili ndodhet gjithashtu nën presion politik të brendshëm, bëri thirrje për unitet politik për t’u përballur me sanksionet.
Kriza ekonomike në Iran është përkeqësuar, që kur SHBA-të u tërhoqën nga marrëveshja bërthamore ndërmjet Teheranit dhe fuqive botërore, e rivendosi sanksionet ekonomike.
Ato kanë për qëllim të rrisin presionin mbi Teheranin, që të heqë dorë nga “aktivitetet malinje”, siç i cilëson Uashingtoni, të tilla si zhvillimi i armëve bërthamore dhe financimi i aktiviteteve terroriste në rajon.
Sanksionet amerikane, veçanërisht ato në sektorin e energjisë, transportit dhe financiar, kanë goditur eksportet e naftës dhe kanë bërë që investimet e huaja të ulen. Ato ndalojnë kompanitë amerikane që të bëjnë tregti me Iranin drejtpërdrejt dhe gjithashtu me ndonjë firmë apo shtet të huaj që kanë të bëjnë me Iranin./Opinion.al
