Rodrigo Duterte, presidenti i Filipineve kërkoi të arrestohen të pavaksinuarit që nuk respektojnë detyrimin për të qëndruar në shtëpitë e tyre.
Thirrja vjen ndërkohë që vendi është në periudhën e kufizimit më të rreptë, që synon ndalimin e rritjes së rasteve të lidhura me variantin Omicron.
Qeveria e Filipineve ka rritur kufizimet në kryeqytet, Manila dhe zona të tjera këtë javë, pasi u trefishua numri i rasteve gjatë dy ditëve të fundit.
Në këtë kuadër, qytetarët e pavaksinuar duhet të qëndrojnë në shtëpi gjatë periudhës së masave të reja, të cilat do të qëndrojnë në fuqi deri në mes të janarit dhe do të mund të dalin vetëm për të blerë gjërat e nevojshme.
“Përballë emergjencës kombëtare i urdhëroj ata (autoritetet lokale) të gjejnë të pavaksinuarit dhe t’u kërkojnë të mos lëvizin. Dhe nëse ata refuzojnë, nëse largohen nga shtëpitë e tyre atëherë autoritetetduhet t’i arrestojnë”, tha Presidenti Duterte në një mesazh të regjistruar.
Rreth 70% e popullsisë në zonën metropolitane të Manilës, ku jetojnë më shumë se 13 milionë njerëz, është vaksinuar plotësisht, por më pak se gjysma e popullsisë në tërësi, sipas shifrave të qeverisë.
Duterte tha se ishte “i shtangur” nga numri i konsiderueshëm i filipinasve që nuk janë vaksinuar ende.
