Presidenti brazilian, Jair Bolsonaro, sulmoi mediat gjatë fjalimit që mbajti në Asamblenë e Përgjithshme të Kombeve të Bashkuara, duke i quajtur “gënjeshtra” raportimet e tyre për zjarret në Amazonë.
Një ditë pasi nuk pranoi të marrë pjesë në një samit të Kombeve të Bashkuara për ndryshimet klimatike, Bolsonaro e përdori fjalimin e tij para Asamblesë së Përgjithshme, për të përsëritur se u bë gjithçka mund të bëhej për shuarjen e zjarreve.
“Është e gabuar të thuhet se Amazona është pjesë e trashëgimisë botërore dhe është e gabuar të thuhet, siç pretendojnë shkencëtarët, që pyjet tona janë mushkëritë e botës”, tha Bolsonaro.
Rritja e shpejtë e zjarreve në rajonin e Amazonës këtë vit, ka ngjallur shqetësime ndërkombëtare për shkak të ndryshimeve klimatike, ndërsa kritikat ndaj qeverisë së tij ishin të ashpra për, atë që u cilësua, dështim për të frenuar zjarret./Opinion.al
