Presidenti amerikan, Joe Biden, paralajmëron se demokracia në Shtetet e Bashkuara po kërcënohet nga mbështetësit e Donald Trump.
“Diçka e rrezikshme po ndodh në Amerikë tani. Kemi një lëvizje ekstremiste që nuk ndan bindjet themelore në demokracinë tonë. Ajo është lëvizja MAGA. Jo çdo Republikan, madje as një mazhorancë e republikanëve, nuk aderojnë në ideologjinë ekstremiste të MAGA-s”,- u shpreh Biden.
Biden shtoi më tej se lëvizja e krijuar dhe e udhëhequr nga ish-presidenti Donald Trump po shtyn para një agjendë ekstremiste në dëm të institucioneve të demokracisë Amerikane.
Akuzën e tij, numri një i Shtëpisë së Bardhë, e mbrojti duke pretenduar se kjo forcë politike po sulmon shtypin e lirë me portretizimin e tij si armik i popullit, po sulmon sundimin e ligjit dhe po ushtron presion ndaj votuesve.
“Demokraci do të thotë sundim i popullit dhe jo i monarkëve, jo sundim i parave apo i të fuqishmëve. Pavarësisht partisë, kjo nënkupton se rezultati i zgjedhjeve të lira dhe të ndershme duhet pranuar dhe respektuar,”-tha Biden.
Këto deklarata i bëri gjatë një eventi në Arizona në përkujtim të trashëgimisë dhe kontributit të senatorit republikan, John McCain, që ndërroi jetë në vitin 2018.
Gjatë fjalimit të tij, Biden u ndërpre në një moment nga disa protestues që kërkonin shpalljen e emergjencës për klimën.
Presidenti amerikan humbi durimin, duke iu kërkuar të mbanin qetësi dhe u premtoi se do të bisedonte me ta pas eventit.
