Presidenti i Afganistanit, Ashraf Ghani u largua nga vendi me katër makina dhe një helikopter të mbushur plot me para, ka pohuar Rusia.
Agjencia shtetërore e lajmeve të Moskës, RIA Novosti, bëri një raport mbi arratisjen e fshehtë të presidentit Ghani nga Afganistani në fundjavë, kur talebanët po sulmonin nga të gjitha anët kryeqytetin.
Një zëdhënës i ambasadës ruse në Kabul, Nikita Ishchenko, u citua të ketë thënë: “Rrëzimi i regjimit karakterizohet nga mënyra se si Ghani u arratis nga Afganistani: katër makina u mbushën me para, ata u përpoqën të fusnin një pjesë tjetër të parave në një helikopter, por jo të gjitha. Disa i lanë në tokë kur ikën”.
Presidenti i Afganistanit u arratis nga Pallati Presidencial në Kabul ditën e dielë, kur talebanët ishin në periferi të kryeqytetit.
“Për të shmangur gjakderdhjen, mendova se ishte më mirë që të largohesha”, shkroi Ghani në Facebook, në komentin e tij të parë pas arratisjes./Opinion.al
