Duket se populli brazilian i është drejtuar rrjeteve sociale për t’i kërkuar ndjesë Zonjës së Parë franceze, Brigitte Macron, pas komenteve fyese që Presidenti i tyre bëri për të.
Hashtagë të tillë si “Na fal, Brigitte’’ ishin mes më të shpërndarëve në rrjetet sociale. Gjithashtu, shkrimtari i njohur brazilian Paulo Coelho postoi një video në Twitter ku i kërkonte falje popullit francez për atë që e quajti histeri kundrejt Francës, Presidentit dhe Zonjës së Parë franceze.
Kujtojmë se incidenti ndodhi pak ditë më parë,kur Jair Bolsonaro iu përgjigj një ndjekësi në rrjetet sociale që krahasonte fotot e zonjave të para të Brazilit dhe Francës, shoqëruar me shkrimin ”Tani e kuptojmë pse Macron i bie në qafë Bolsonaros”.
Presidenti 64-vjeçar komentoi: “Mos e poshtëro tjetrin, hahaha”, duke iu referuar Macronit.
Kur u pyet për këtë postim në samitin e G7-s, Macron tha: “Femrat braziliane ndihen të turpëruara nga Presidenti që kanë. Ka thënë gjëra të pasjellshme ndaj gruas sime. Unë kam shumë respekt për popullin brazilian dhe shpresoj vetëm që së shpejti të kenë një president të denjë”./Opinion.al
