Teksa procesi i numërimit të votave për garën presidenciale në Maqedoninë e Veriut vijon, Klan Macedonia raporton se sipas rezultateve të fundit nga Komisioni Shtetëror i Zgjedhjeve, nga blloku shqiptar Bujar Osmani nga Fronti Europian prin ndaj kandidatit të VLEN, Arben Taravari.
Sipas votave të deritanishme, Osmani ka 81.748 ose 15,63% të votave, ndërsa Taravari 59.591 ose 11,39%.
Në selinë e BDI-së në Tetovë ka nisur festa, ndërsa nga selia e VLEN në Shkup, ka heshtje dhe asnjë prononcim për mediat.
Mbi 1 milion e 800 mijë zgjedhës iu drejtuan këtë të mërkurë kutive të votimit për të votuar për kandidatët për president në Maqedoninë e Veriut. Në garë janë 7 kandidatë, mes të cilëve presidenti aktual, Stevo Pendarovski, i mbeshtetur nga LSDM dhe Gordana Davkova që përfaqëson opozitën maqedonase, që udhëhiqet nga VMRO-DPMNE.
Për Komisioinin Qendror të Zgjedhjeve procesi në përgjithësi ka shkuar mirë, përveç disa problemeve të vogla. Ndërsa ai po monitorohet edhe nga vëzhguesit e shumtë ndërkombëtarë. Pjesëmarrja në votime sipas shifrave të mesditës është e kënaqshme.
Fitues zgjidhet kandidati që fiton mbi 50 përqind të votave, me kusht që në zgjedhje të dalin mbi 40 përqind e qytetarëve me të drejtë vote. Sipas të gjitha gjasave, do të ketë një raund të dytë votimi, ku në balotazh do të dalin dy kandidatët që rezultojnë me më shumë vota./Tv Klan
