Zëdhënësi i Presidencës Tedi Blushi ka reaguar pas deklaratës së bërë nga të kryetarja e komisionit të Ligjeve, Ermonela Felaj.
Ajo është shprehur se KLGJ, në raportin që i ka dërguar Kuvendit, ka gjetur një sërë shkeljesh të Këshillit të Lartë të Drejtësisë (KLD), nën kryesimin e kreut të shtetit.
“Në raportin e Këshillit të Lartë të Gjyqësorit janë gjetur një sërë shkeljesh të bëra nga Këshilli i Lartë i Drejtësisë, të cilin e drejtonte Presidenti.”
E pyetur se nga këto gjetje, apo më tej nga shkelja e rëndë e Kushtetutës, do të ketë arrestim të Presidentit Meta, Ermonela Felaj u përgjigj: “Jo domosdoshmërish. Varet nga rasti që do të marrin në shqyrtim. Komisioni Hetimor do të raportojë nëse këto shkelje janë ose jo çështje penale”, deklaroi ajo.
Ndërkohë, zëdhënësi i Presidencës përmes një postimi në “Facebook”, është shprehur se Felaj la të dyshohej se presidenti Ilir Meta mund të arrestohej për shkeljet që ajo ka folur.
Për Blushin, kjo deklaratë është një minë me sahat për reformën në drejtësi.
“Mungesa e vendosmërisë së hekurt revolucionare që shfaqi sot deputetja Ermonela Felaj, duke lënë një fije dyshimi që Presidenti i Republikës edhe mund të mos arrestohet, është një minë me sahat për “fitoren” përfundimtare të Reformës në Drejtësi!”, shkruan zëdhënësi i Presidentit./ Opinion.al E.Xh.
