Zëdhënësi i Presidentit Meta, Tedi Blushi ka replikuar në distancë me gazetarin Baton Haxhiu pas një shkrimi të këtij të fundit botuar në opinion.al
Në shkrimin me titull “Presidenti mungon!”, Haxhiu mban qëndrim kritik ndaj retorikës së presidentit Meta lidhur me problemin e emigracionit. Ai shkruan ndër të tjera se shifrat e emigracionit nuk duhen parë vetëm si statistikë por duhen analizuar.
LEXO: Presidenti mungon! – Nga Baton Haxhiu
Në një status në Facebook, zëdhënësi i presidencës e akuzon gazetarin për interesa anti-kombëtare.
“Batonoviç, ti për një vilë në Palasë je gati jo vetëm të shesësh gjysmën e Kosovës, por mezi pret t’ja dhurosh Serbisë, edhe Tiranën e Sheshin e Flamurit në Vlorë. Madje për të shkuar sa më shpejt tek vila në Palasë, ke kohë që lobon për tunelin e Llogarasë, që të mos kalosh nga rruga që ndërtoi Kryeministri Meta.”, shkruan Tedi Blushi.
Më tej ai i referohet të dhënave nga “European Asylym Support Office”, dhe thekson faktin se ato tregojnë për një fatkeqësi kombëtare.
“Hapi sytë katër Batonoviç dhe lexo të dhënat zyrtare e “European Asylym Support Office” për shpopullimin dramatik të Shqipërisë, që ka shkaktuar me keqqeverisjen e tij, sivëllai i padronit tënd në Beograd: Një krahasim për intensitetin e azilkërkuesve për 1000 banorë të vendit tonë me vendet e rajonit. Shqipëria ka një numër azil kërkuesish për periudhën 2-vjeçare, korrik 2018 – korrik 2020, rreth: 18.4 herë më të lartë se Bosnja, 17.4 herë më të lartë se Mali i Zi, 12 herë më të lartë se Serbia, 5.1 herë më të lartë se Maqedonia e Veriut, 3.9 herë më të lartë se Kosova. Nëqoftëse në 1000 banorë sot emigrojnë në Bashkimin Europian, Nga Shqipëria emigrojnë 12 PERSONA. Nga Kosova 3.3 persona. Nga Maqedonia e Veriut 2.3 persona. Nga Serbia 1 person. Nga Mali i Zi 0.7 persona. Nga Bosnja Hercogovina 0.6 persona. Pjesa më e madhe e atyre që po ikin janë TË RINJ. Hapi sytë katër Batonoviç! Kjo është FATKEQËSI KOMBËTARE! Shqipëria dhe Kosova kanë pasur burra që i kanë mbrojtur dhe do t’i mbrojnë në çdo kohë interesat kombëtare. Për këtë të jesh i sigurtë ti, padroni, punëdhënesi dhe pagatorët e ty shqipfolës!”, shkruan zëdhënësi i presidencës. /Opinion.al
