Kërkesa për heqjen e tarifës ndaj SHBA-së është bërë shkak i përplasjeve në rrjete sociale ndërmjet zyrtarëve të Presidencës së Kosovës dhe të Qeverisë.
Krejt kjo pas njoftimit të Presidentes Osmani, se ka kërkuar nga Qeveria që të pezullojë tarifat e importit për të gjitha produktet nga Shtetet e Bashkuara të Amerikës.
Ministri në detyrë i Financave, Hekuran Murati, u mor me qasjen e dërgimit të kërkesës nga Presidentja. Ai ka thënë se shteti serioz këto çështje i trajton larg mediave e nuk munguan kundërpërgjigjet nga stagi i Presidencës.
Këto përplasje publike, analisti Artan Muhaxhiri i sheh si një lojë pozicionimi për zgjedhjen e presidentit të ardhshëm.
“Kjo i dobëson të dy, edhe Presidenten Osmani edhe kryeministrin Kurti. “, shprehet Muhaxhiri.
Sipas tij, fakti që përplasjet po ndodhin në rrjetet sociale dhe në media tregon mungesë lidershipi nga të dyja palët.
Përveç Presidentes, qeverisë për heqjen e taksave ndaj SHBA-së i kanë bërë thirrje edhe partitë politike opozitare, si dhe Oda Ekonomike Amerikane dhe Oda Ekonomike e Kosovës.
Kërkesa për heqjen doganore për mallrat amerikane vjen menjëherë pasi Presidenti amerikan, Donald Trump, i ka vënë tarifa 10% edhe Kosovës.
Tv Klan
