Që prej marrjes së mandatit, kryebashkiaku i Tiranës Erion Veliaj ka premtuar vazhdimisht autobusët elektrikë në kryeqytet.
Në vitin 2016 ai hodhi idenë dhe premtoi se shumë shpejt do të hynin në qarkullim këta autobusë, në vitin 2017 premtoi se brenda mandatit Tirana do të kishte të paktën një linjë me autobusë elektrikë, ndërsa në tetor të po atij viti në sheshin “Nënë Tereza” prezantoi edhe autobusin e parë elektrik, duke thënë se kishte nisur testimi dhe se Tirana ishte në avangardë të ndryshimeve pozitive në këtë drejtim.
Por sot, në mars të vitit 2019 dhe në prag të zgjedhjeve lokale, Veliajt i është dashur të përsërisë edhe një herë premtimin, duke e shtyrë realizimin e projektit për dekadën e ardhshme. Në një aktivitet, Erion Veliaj ka premtuar këtë herë se brenda vitit 2030 Tirana do ta ketë të gjithë flotën e autobusëve 100% elektrikë.
“100 për qind e autobusëve do të jene elektrik brenda vitit 2030, një operacion që e fillojmë tani dhe që do të kemi 11 vite kohë që çdo vit të ndryshojë flota. Një autobus elektrik sot kushton gjysmë milionë euro. Do të na duhet të kemi kreativë dhe në mënyrën se si do të financojmë edhe projekte të tilla”, u shpreh sot ai./Opinion.al
