Kapiteni i Kombëtares shqiptare, Ansi Agolli ka folur për sfidën e 6 tetorit kundër Lihtenshtejnit të vlefshme për eliminatoret e Kampionatit Botëror ‘Rusi 2018’.
Në një intervistë për ‘Super Sport’, Agolli vlerësoi prezencën e madhe të tifozerisë pavarësisht se ndeshja luhet në transfertë.
“Atmosferën mund ta shohësh sapo zbret në aeroport. Siç kemi pasur edhe këtë ndeshje do kemi një mbështetje të madhe nga tifozët tanë të cilët do na bëjnë të ndihemi sikur luajmë në shtëpi. Ky është një plus i madh që ne që të kërkojmë të marrim maksimumin”, u shpreh ai.
Mbrojtësi kuqezi ka paralajmëruar kuqezinjtë se nuk ka më skuadra të vogla dhe premtoi se Shqipëria është maksimalisht e përqendruar në sfidën e radhës.
“Në futbollin e sotëm nuk ka kundërshtar të dobët. Duhet pasur shumë kujdes sepse janë lojtarë që luajnë me zemër. Duhet të jemi të përqëndruar për të mos gabuar dhe më pas t’i ndëshkojmë për të arritur objektivin tonë. Mendoj se duhet të sulmojmë por duhet të kemi kujdes në mbrojtje pasi këto skuadra e përdorin shumë mirë kundërsulmin dhe duhet të jemi të përqendruar nga kjo anë”, përfundoi Agolli.
