Sulmi me armë kimike në Siri ka prekur miliona persona në mbarë botën, ndërkohë që historia e një babai që humbi fëmijët binjakë dhe bashkëshorten ka tërhequr vëmendjen e mbarë mediave ndërkombëtare. 29-vjeçari Abdel Hamid Aljusef shprehet se incidenti me përmasa tragjike i ka shkatërruar familjen, ndërsa shton se e ka të vështirë të gjejë motivin dhe forcën për të jetuar.
Nga 72 viktimat që u regjistruan pas sulmit me armë kimike në Idlib të Sirisë, 22 prej tyre i përkisnin familjes Aljusef, e cila për fat të keq, banonte shumë pranë zonës ku ndodhi bombardimi i qeverisë siriane.
Kjo dramë njerëzore ka prekur miliona persona në mbarë botën, ndërsa historia e një prej djemve të kësaj familjeje ka tërhequr vëmendjen e mediave më të njohura ndërkombëtare, informon ora news.
Për 29-vjeçarin, Abdel Hamid Aljusef, bombardimi ishte një goditje mjaft e rëndë, e cila siç shprehet ai, e ka lënë pa asnjë motiv në jetë, pasi i mori dy fëmijët e tij binjakë 9-muajsh, vajzën Aja, djalin Ahmed si dhe bashkëshorten Dalal.
Abdel ka rrëfyer momentet e dhimbshme pas sulmit ndërsa tregon se çfarë ndodhi ekzaktësisht.
“Nuk ndodhesha në shtëpi kur ndodhi sulmi. Sapo mora vesh se çfarë kishte ngjarë, vrapova në banesë. Nxora fëmijët përjashta, mamanë e tyre dhe të afërmit e tjerë. Mbaj mend që ishin të ndërgjegjshëm për një moment, por pas dhjetë minutash kuptova se situata ishte e rendë. Lajmëruam menjëherë ambulancat por fatkeqësisht ato nuk erdhën në kohën e duhur. Nuk munda të bëj asgjë për familjarët e mi. Tashmë të gjithë janë ndarë nga jeta.”
Aktualisht, 29-vjeçari ndodhet në një moment mjaft të vështirë psikologjik.
Miqtë e tij të afërt thonë se edhe Abdel ka një sërë komplikacionesh shëndetësore për shkak të armëve kimike që u shpërndanë, e megjithatë substancat helmuese as që mund të krahasohen me dhimbjen e humbjes së familjes dhe të të afërmve të tij.
Historia e Abdel nuk është as e para e as e fundit për banorët e Sirisë.
Pas më shumë se 6 vitesh luftime, 6 milionë sirianë kanë zgjedhur Europën për të kërkuar azil me qëllim që t’i largohen luftës, 3 milionë të tjerë janë shpërngulur brenda për brenda Sirisë, 250 mijë janë ndarë nga jeta, ndërkohë që miliona të tjerë, vijojnë të qëndrojnë mes jetës e vdekjes, mes dhimbjes dhe shpresës.
