Ish-kandidati i PD-së për deputet, Preç Zogaj ka shfaqur pendesë për marrëveshjen e arritur më 18 maj mes Lulzim Bashës dhe Edi Ramës. Zogaj deklaroi në ‘Këndin e Ekselencës’ në News 24 se rrjedhja e ngjarjeve tregoi se PD duhet të hynte në zgjedhje në luftë politike me qeverinë dhe jo me atë paqe që u arrit. Ai theksoi se marrëveshja maskoi problemet e hashashit dhe blerjes së votave, duke i dhënë më shumë komoditet këtyre fenomeneve.
“Edi Rama zhduku garën gjatë mandatit 4 vjeçar. PD më mirë të shkonte në luftë politike me qeverinë sesa me këtë paqe. PD refuzoi pjesëmarrjen në zgjedhje me koston e përballjes me Europën. Marrëveshja nuk i zgjidhi problemet e kanabisit dhe blerjes së votave, por i maskoi. Marrëveshja i maskoi këto probleme që të vijonin në komoditet. PD vendosi të tërhiqej pasi ndërhynë amerikanët. Edi Rama i ka prerë në besë Lulzim Bashës, por nuk mund të presim më shumë prej atij. Rama ka thyer një marrëveshje të ndërmjetësuar nga SHBA”, tha Zogaj.
Zogaj tha se shit-blerja e votës më 25 qershor ishte masive dhe në Lezhë katër vota janë blerë për 1 mijë euro.
Burimi: Politiko.al
