“Një bast i fituar nga Frosinone, një blerje surprizë e Torinos”. Kështu është cilësuar nga “Tuttomercatoweb” mbrojtësi i Kombëtares së Shqipërisë, Arlind Ajeti, teksa vijon të marrë vlerësimet nga mediat italiane. Pasi vlerësoi ofertat e ndryshme të mbërritura në adresë të tij, Arlind Ajeti zgjodhi ekipin granata për të qëndruar në Seria A, pas rënies së Frosinones në Seria B. Një transaksion me parametra zero. Ajeti, sezonin e kaluar nënshkroi me Frosinonen një kontratë që skadonte më 30 qershor, me opsionin për të rinovuar automatikisht edhe për dy sezone të tjera, në rast se ekipi do të mbijetonte në Seria A. Klubi torinez realizoi kështu një lëvizje blitz, teksa zyrtarizoi Ajetin, pikërisht në momentin kur mbrojtësi dukej shumë pranë transferimit te Pescara.
“Futbollisti 23-veçar me shumë eksperiencë ndërkombëtare mes radhëve të Bazelit, Ajeti këtë verë ka zhvilluar një paraqitje të mirë në Kampionatin Europian me fanellën e Shqipërisë, të udhëhequr nga trajneri italo-shqiptar, Gianni De Biasi. Nga ana tjetër, ishte pikërisht trajneri De Biasi, ai i cili ka dalë garant për Ajetin, pranë zyrtarëve të klubit të Torinos. De Biasi e ka krahasuar Ajetin me kapitenin historik të Torinos, Oscar Brevi”, shkruan portali “Tuttomercatoweb”, duke pohuar kështu funksionin e dyfishtë të De Biasit, tashmë edhe në rolin e menaxherit të futbollistëve të Kombëtares Kuqezi.
