Një person është arrestuar dhe një tjetër është shpallur në kërkim pasi do të transportonin në mënyrë të paligjshme disa personave me shtetësi të huaj.
Sipas njoftimit të policisë këta dy persona kanë marrë një mjet të cilit më pas i kanë vënë logo si të një ambulancë në mënyrë që ti shpëtonin kontrollit të policisë me qëllim transportimin e emigrantëve të paligjshëm, në këmbin të pagesës që do të merrnin prej tyre.
Gjatë operacionit 31-vjeçari me iniciale R.Ll banues në Tiranë, i cili rezulton i dënuar më parë për veprën penale, “Drejtimi i automjeteve në mënyrë të parregullt” tentoi t’i largohej policisë duke mos iu bindur urdhrit të tyre, por u kap dhe ndalua.
Bëhet e ditur se në kërkim është shpallur 27-vjeçari me iniciale D.O. Sipas njoftimit të policisë ata do të organizonin transportimin nga Devolli në drejtim të Tiranës, të disa të emigrantëve, të cilët kishin hyrë në mënyrë ilegale në territorin shqiptar.
Blutë kanë organizuar shërbimet përgjatë aksit rrugor Devoll-Pogradec, me qëllim kapjen e tyre. Policia është vënë në ndjekje të një mjeti tip “Volkswagen” në pronësi të 27-vjeçarit D. O dhe me drejtues 31-vjeçarin me iniciale R. Ll, sepse dyshonin se brenda tij ndodheshin emigrantë.
Në afërsi të fshatit Vreshtas, Policia i ka bërë me shenjë 31-vjeçarit që të ndalonte, por ky i fundit nuk i është bindur urdhrit të tyre dhe ka kryer manovra të rrezikshme në rrugë duke rrezikuar jetën e punonjësve të policisë, pasagjerëve të tij si edhe përdoruesve të tjerë të rrugës, ku më pas u neutralizua dhe ndalua në fshatin Petrushë, Pogradec.
Dy personat e mësipërm në bashkëpunim mes tyre dyshohet se iu kishin premtuar emigrantëve të huaj, kalimin dhe transportimin e tyre drejt vendeve të BE-së, kundrejt fitimit./Opinion.al/
