Austria do të jetë “oazi” i përgatitjeve të kuqezinjve tanë para fillimit të finaleve të europianit “Francë 2016”, të cilat si dihet do të zhvillohen më 10 qershor deri 10 korrik.
Madje me shumë gjasa, landi i Steiermarkut do të jetë vendi mikpritës, ku do të akomodohen dhe stërviten futbollistët tanë të kombëtares para se të fluturojnë drejt Nicës së Francës, ku do të jetë edhe “shtëpia” e kuqezinjve gjatë ditëve të finaleve.
Trajneri i kombëtares Xhani de Biazi ka vizituar dhe parë nga afër kushtet që të ofrojnë dy nga kampet stërvitore në Bad Valtersdorf dhe Bad Radkersburg, të cilat ndodhen në të ashtuquajturën “zemra e gjelbërt” e Austrisë, ku në stinën e verës stërviten skuadra si Reali i Madridit, Arsenali, Roma dhe shumë skuadra të njohura të kontinentit.
Lajmi bëhet i ditur nga faqja në zyrtare në internet “International Football Camp Styria”, ku drejtori i kësaj qendre sportive turistike, Kian Valizadeh, ka shoqëruar trajnerin e kombëtares sonë Xhani De Biazi, në këtë vizitë të tij.
Ndërsa është deklaruar, se Austria do të jetë edhe vendi ku kombëtarja do të stërvitet para finaleve të “Francë 2016”, pritet që në ditët e ardhshme, FSHF të zyrtarizojë edhe kampingun stërvitor të kuqezinjve, ku besohet se Bad Valtersdorf ose Bad Radkersburg, mund të jetë “oazi” i kuqezinjve./ Sporta.al
