Shpesh për të fituar nuk duhen vetëm këmbë por edhe fat. Nesër në orën 16.00 në stadiumin “Skënderbeu” të Korçës, luhet kryendeshja Skëndërbeu-Partizani e vlefshme pëe sfidën kryesore të javës së parafundit të fazës së dytë të Ligës Superiore të futbollit shqiptar. Të dyja skudrat kryesojnë renditjen me 40 pikë të shkëputura nga ndjekëset, ndaj edhe kjo ndeshje merr vlera të veçanta. Për të pasur fatin me vete, një pjesë e lojtarëve të Partizanit i janë drejtuar ditën e sotme xhamisë “Dine Hoxha” në rrugën e Kavajës, ku kanë kryer ritet e faljes së xhumasë.
Ky çast është fiksuar nga lojtarët edhe në një foto, ku kanë pozuar bashkë me imamin Ahmet Kalaja, i njohur për lidhjet e tij me mjaft futbollistë, por në veçanti me mbrojtësin kuqezi Mërgim Mavraj.
“Sot mbas stervitjes me cunat e ekipit falim Xhumane ne xhamine Dine Hoxha me Hoxhe Ahmet Kalaja. Allahu na e pranofte”, shkruan në faqen e tij në “facebook”, Xhevahir Sukaj, ku shoqëruesit e sulmuesit të Partizanit kanë qenë Kalari, Ibrahimi, Plakun, Dajë, Tafili dhe Vrapi.
