Një fotograf dhe modele turke janë arrestuar nga policia në Ankara, për ‘fyerje të vlerave fetare’ pas një seti fotografik në xhaminë Kocatepe të qytetit, thanë prokurorët.
Fotografi Bilal Kisa dhe modelja Ezgi Cebeci u përballën me një reagim të ashpër nga autoritetet nacionaliste dhe islamike në mediat sociale pasi Kisa ndau fotot e bëra brenda dhe para xhamisë.
Në fotot e postuara në Instagram, të cilat janë fshirë pas reagime të ashpra, modelja shihet e veshur me një bluzë të bardhë të shkurtër dhe me një shami në kokë, ndërsa pozonte në xhaminë Kocatepe.
Kisa kërkoi falje të hënën, por megjithatë ai dhe Cebeci u arrestuan dhe iu konfiskuan fotot.
“U nis një hetim për krimin e fyerjes publike të vlerave fetare të adoptuara nga një pjesë e publikut… për shkak të fotografive të bëra nga një regjisor i quajtur Bilal Kisa me një grua në Xhaminë Kocatepe të Ankarasë dhe të publikuara në mediat sociale” tha në një deklaratë Prokuroria në Ankara.
Në kërkim të faljes së tij, Kisa tha se puna e tij kishte “devijuar nga qëllimi i saj”.
Ai këmbënguli se nuk kishte ndërmend të fyente Islamin apo muslimanët, por se dëshironte të sfidonte “paragjykimet e një grupi të caktuar njerëzish që ofendohen nga xhamia dhe të tregojnë se vendi ku do të gjejnë paqe është xhamia”.
“I kërkoj falje kujtdo që lëndova dhe keqkuptova”, shkroi ai./Opinion.al
