Aleanca për Teatrin ka thirrur sot protestën e radhës në orën 17:30. Ata kanë paralajmëruar se aksioni i tyre me protesta do të vijojë deri në rrëzimin e qeverisë dhe dorëheqjen e Kryetarit të Bashkisë së Tiranës dhe i kanë bërë thirrje SPAK të hetojë aksionin e shembjes së godinës së teatrit.
Nga ana tjetër policia ka ngritur sërish postblloqe në akset rrugore që lidhin Tiranën me rrethet. ABC News raporton se në kryqëzimin e Bradasheshit në Elbasan efektivët e Drejtorisë së Policisë së Elbasanit ndalojnë çdo makinë dhe ushtrojnë kontroll të dokumentacionit të drejtuesve të automjeteve por edhe makinat. Disa prej automjeteve nuk janë lejuar të udhëtojnë drejt Tiranës, pasi sipas policisë këta drejtues nuk kanë justifikuar udhëtimin e tyre drejt Tiranës ndërkohë që disa të tjerë janë lejuar të vijojnë rrugën.
Ndërsa në brendësi të Bradasheshit ndodhet postblloku i parë i policisë rrugore, në brendësi të rrugës që çon drejt Tiranës ndodhet edhe një tjetër postbllok. Nga ky postbllok ushtrohet përsëri kontroll në automjetet e lejuara nga postblloku i parë.
Një postbllok tjetër është ngritur në dalje të qytetit të Shkodrës. Aty janë vendosur forca policie të shumta dhe janë ndaluar disa makina.
Shtim të numrit të forcave të policisë ka edhe aksin Krujë – Tiranë. Postblloku bën kontrolle të imtësishme të automjeteve që hyjë dhe dalin jashtë qytetit.
Kujtojmë se Shkodra, Kruja dhe Tirana janë ende zona të kuqe si pasojë e situatës së COVID-19 ndërsa policia ka bërë thirrje në njoftimet e saj që qyetetarët të mos protestojnë pasi kjo është në kundërshtim me aktin normativ të qeverisë për parandalimin e përhapjes së virusit. /Opinion.al
