Portieri i pretenduar nga Barcelona, Jasper Cillessen, është protagonist i disa “memes” qesharake, që qarkullojnë në rrjetet sociale. “Gardiani” i Ajax është përzgjedhur nga departamenti teknik i katalanasve për të plotësuar vendin e lirë, që do të krijohet nga largimi i Claudio Bravo. Referuar momenteve pikante të tij në finalet e “Botërorit 2014” me kombëtaren holandeze, Jasper Cillessen shumë pak mund të imagjinohet shtrirë, apo mes portës së vet, nga krijuesit e “memes”.
Që nga ajo kohë, e luajtjes me kombëtaren holandeze në “Brazil 2014”, figura e tij shfaqet në argëtime të panumërta dhe montazhe të mprehta, të cilat qarkullojnë në rrjetet sociale. Diku i ulur në një shtrat, hipur në një aeroplan; mbi njërin krah të statujës gjigante të Jezu Krishtit në Brazil, në metro, ose direkt mbi Neymar, Cillessen ka shërbyer si frymëzim për shumë autorë të zgjuar “memes”. Ata kanë gjetur, kësisoji, një minierë ari me portierin holandez.
Shumë nga këto “memes” ishin virale në atë kohë dhe tani, që emri i tij tingëllon çdo ditë e me më shumë forcë si përforcimi i ri i Barcelonës, po i risjellim si momente “fun” të tij për lexuesit. Cillessen do të largohet nga Ajax për të nënshkruar me Barcelonën, por duket se operacioni do të zhvillohet pas angazhimit të skuadrës holandeze në Ligën e Kampionëve, këtë të mërkurë në fushën e FC Rostov.
