SHBA nuk i dha Turqisë “dritën jeshile” për ofensivën e saj në veri të Sirisë, thotë sekretari i shtetit i SHBA.
Në një intervistë për PBS, Pompeo mbrojti vendimin e Trump për të tërhequr forcat e SHBA, duke shtuar se Turqia kishte një “shqetësim real për sigurinë” dhe “një kërcënim terrorist në jugun e tyre”.
Ai tha se raportet që pretendojnë se SHBA i lejoi Turqisë të niste sulmimin ishin “thjeshtë false”.
“Shtetet e Bashkuara nuk i dhanë Turqisë një dritë jeshile,” tha ai.
Në një deklaratë të mëparshme, Trump – i cili kishte kërcënuar të “shkatërronte” ekonominë e Turqisë nëse shkonte “jashtë kufijve” – tha që SHBA nuk e “miratojnë këtë sulm”, duke e quajtur operacionin një “ide të keqe”.
Presidenti më vonë tha në një konferencë shtypi se turqit dhe kurdët “kanë luftuar njëri-tjetrin me shekuj”, dhe tha se luftëtarët kurdë “nuk na ndihmuan në Luftën e Dytë Botërore, ata nuk na ndihmuan me zbarkimin në Normandi ”.
“Me gjithë ato që janë thënë, ne i duam kurdët”, shtoi zoti Trump.
Republikanët dhe Demokratët kanë dënuar vendimin për të tërhequr trupat amerikane.
Turqia ka filluar një sulm në territorin e mbajtur nga forcat e udhëhequra nga kurdët, deri tani aleatë të SHBA në rajon.
Presidenti Rexhep Erdogan tha që qëllimi ishte të “parandalojë krijimin e një korridori të terrorit” në kufi.
Forcat turke planifikojnë të krijojnë një “zonë të sigurt” të pastruar nga milicitë kurde, e cila gjithashtu do të strehojë refugjatë sirianë. Por kritikët thonë se operacioni mund të çojë në spastrim etnik të popullatës kurde dhe një ringjallje të grupit militant të Shtetit Islamik (IS).
Forcat kurde u zotuan t’i rezistojnë ofensivës dhe tashmë janë përplasur me trupat turke. /Opinion.al
