Sekretari amerikan i Shtetit, Mike Pompeo, akuzoi Rusinë se po tenton të minojë demokracinë në Evropë dhe për dezinformim, ndërsa Kinën për fushatën e shantazhit në mënyrë që të fitojë ndikimin në botë.
Pompeo u bëri thirrje vendeve evropiane të mbrojnë parimet e demokracisë dhe të kujdesen më shumë për sovranitetin e tyre.
“Rusia vazhdimisht po përpiqet të minojë demokracinë dhe sigurinë tuaj përmes fushatave dezinformuese, sulmeve kibernetike, ajo po përpiqet të riformulojë historinë tuaj. Ekziston gjithashtu një kërcënim nga Partia Komuniste Kineze dhe fushata e saj e shantazhit”, tha Pompeo, në parlamentin e Çekisë, në kuadër të një vizite dyditore në këtë vend.
Kreu i Departamentit Amerikan të Shtetit shtoi gjithashtu se regjimet autoritare nuk u zhdukën në 1989.
Sipas Pompeos, problemi me Kinën është më kompleks sesa rivaliteti që ka qenë me ish-Bashkimin Sovjetik gjatë Luftës së Ftohtë, sepse Kina kërkon të ndikojë tek vendet e ndryshme përmes bashkëpunimit ekonomik, pastaj duke i kërcënuar me pasoja nëse nuk veprojnë ashtu siç dëshiron Pekini.
“Mos i besoni askujt që Perëndimi po dështon. Perëndimi po fiton. Ne duhet të bashkëpunojmë. Ne kemi një detyrim të flasim hapur para të gjithëve, pa frikë”, tha Pompeo./Opinion.al
