Presidenti i Polonisë, Andrzej Duda, kundërshtoi propozimin e presidentit të Shteteve të Bashkuara, Donald Trump, për ta rikthyer Rusinë në grupin e vendeve më të industrializuara G7, duke thënë se një gjë e tillë është e papranueshme duke marrë parasysh pushtimin e territorit të Ukrainës nga Rusia.
“A duhet të kemi qasje të zakonshme ndaj Rusisë? Mendoj që jo, në rrethanat ekzistuese”, tha Duda në një konferencë për media me nënpresidentin amerikan, Mike Pence, në Varshavë.
Riintegrimi i Rusisë në G7 i ka ndarë udhëheqësit e grupit në samitin e javës së kaluar në Francë. Rusia është përjashtuar nga G7, që më parë njihej si G8, pasi ka aneksuar gadishullin ukrainas të Krimesë në vitin 2014. Por, Trump, tha se do ta ftonte Rusinë në takim vitin e ardhshëm.
Ky propozim u mbështet nga Franca, por u kritikua nga Britania dhe Gjermania. Nga ana tjetër zëvendëspresidenti Pence u shpreh me një ton tjetër dhe tha se është e rëndësishme që “të qëndrohet vigjilent” ndaj Rusisë. Ai akuzoi Moskën për përpjekje për të ndërhyrë në zgjedhjet në SHBA./Opinion.al
